Long mun blong October displa yia, bikpla focus or luksave ibin go long toklukaut long ol meri na man long Papua New Guinea long kisim test kwik taim, taim oli lukim sain blong cancer long bodi blong ol, tasol i nau gat bikpla wari long sait blong treatment.
Oli bin karim aut wanpla wok painim blong Human Papillomavirus na ol narapela Related Cancers long kantri long 2023, we i soim olsem long wanwan yia, 1077 meri i save painim aut olsem oli gat cervical cancer na 650pla meri i save dai long displa disease.
Long mun October blong displa yia, planti ol man meri na ol yangpla insait long Papua New Guinea, i save harim na lukim bikpla tok lukaut long sait blong cancer long makim October olsem Breast Cancer Awareness Month.
Wanpla lain we i save go pas long displa ol tok lukaut na event, em PNG Cancer Foundation, we moni we ol kampani i givim o halivim ol long en, isave go long ol event we i ken daunim salens blong cancer insait long kantri.
Tasol, nau i gat wari long wanpla meri husait i gat sik cancer long displa taim, olsem sot blong ol drug we i ken halivim planti ol mama long pait agensim cancer ino wok long kamap long ol Provins.
Theresa Gizora, em wanpla wok meri insait long Port Moresby husait i wok long pait agensim sik cancer, tasol emi wari olsem sik cancer blong em inau wok long spread o go bikpla insait long bodi blong em.
Em itok, nambawan diagnosis we emi bin kisim long Port Moresby General hausik, em Theresa itok olsem emi no bin raitpla cancer we oli painim long susu blong en.....
Theresa Gizora itok, laspla chemo therapy we emi mekim em long mun June blong displa yia, na displa em wanpla bikpla risk we emi gat long wanem displa sik cancer i ken go bikpla.
Long nau, em itok em i nid long painim aut hau emi controlim cancer long respond long ol hormones blong bodi blong em, we i bin salim em long kisim halivim long wanpla Dokta insait long East Britian Provins.
Ms Gizora itok, em bin ringim displa dokta long St Mary's Vunapope Hausik, husat i wanpla blood Specialit dokta, na painim aut olsem, planti ol cancer patient, i no kisim marasin long wanem inogat marasin long hausik.
Emma Gole, i bin readim stori blong Theresa Gizora long facebook, na ibin wari nogut tru long wanem em tu i wok long pait agensim cancer tasol emi laki long kisim halivim tamblo long Australia.
Em tok, bikpla hausik olsem Port Moresby General hausik, i mas gat inap save, marasin, masin na woklain long halivim ol cancer patient husait i nidim tru halivim.
Emma Gole itok, stretpla diagnosis blong cancer em i wanpla bikpla samting tu long sevim laip.
Theresa Gizora ito tu olsem, dokta blong en we i wok long laik halivim em long East New Britian Provins, i tokim em olsem planti ol cancer patient i nau kisim taim long wanem oli no wok long kisim marasin.
Long wankain taim, Emma Gole, husait iwok long kisim halivim long Australia, i wari long ol meri insait long kantri blongen yet, husait i wok long dai o sik nogut tru, taim i gat sans yet long sevim laip blong ol.