National Palament blong Vanuatu ibin mit long smol taim nomo tete moning long stat blong 2nd Ordinary Session blong hem and hem adjourn igo long Tuesday neks wik.
Speaker blong Palamen, Seoule Simeon i adjournim Palamen blong givim taem long ol Memba blong Palamen blong oli lukluk gut long plande Gavman Bills we bae oli toktok long hem long session ia.
Plande ol niufala Bills blong mekem ol niufala lo mo ol Amendment Bills nao Gavman Whip, Efate Rural MP, Jean Baptiste Tama hem bin ridim aot long Palement long tude.
Ol Bills ia hem inkludim Vanuatu National Budget blong 2024, wan Bill blong protektim data mo privacy lo, wan Digitsl Safety Authority, wan Disaster Recovery Resilience lo, wan Bill blong Right to Information mo wan Bill blong Political Parties Regulation Act.
Vanuatu ibin gat political instability oltaem mo plande change long gavman long smol taem nomo, so tufala saet blong politics enriwan ibin expressim konsen long hem ia... so Political Parties Regulation Act ia hem blong lukim moa political stability long kantri.
Afta Gavman Whip Mr Tama hem talem aot ol Bills ia, Speaker Seoule Simeon hem mekem anaonsmen blong adjournim Palamen kasem Tuesday moning long neks wik.
Nomata ibin gat sam toktok long tufala Opposition mo Gavman saet raon long hu nao kolem session ia mo hu nao hem askem blong adjournim palamen, Speaker hem se tufala saet evriwan i agri olsem ol memba we i bisi tu long saet blong Cyclone Lola disasta wok, oli nidim taem blong lukluk long ol ova 30 Bills ia.