Tokura itok nogat wanpla iantap long loa long Bougainville

Chief blong Bougainville polis na deputi polis komisina long Papua New Guinea, Francis Tokura itok keis blong foma Bougainville polis, Sheena Cook istap long kot nau we em ibin kisim sas pinis long kot. 

Deputi Komisina Tokura itok toktok blong papa blong Sheena Cook olsem polis ibagarapim Ms Cook em ino tru. 

Em itok Ms Cook isave pinis long ol rong em imekim na ol famili blong em inoken putim ol giaman toktok long sosol media. 

Mr Tokura itok nogat wanpla man o meri istap kalabus long han blong polis iantap long loa na olgeta lain husat ikisim disisen blong kot isave bungim wankain mekim save.