West Papua lida na intanesenal mausman blong National Committee for West Papua (KNBP), Victor Yeimo ibin kisim wanpla peace awod long Melbourne siti long Australia las wik we iluksave long wok em isave mekim long pait long fridom blong ol West Papua pipol.
Em itok em ihamamas long displa luksave em ikisim we em itok em blong olgeta pipol blong West Papua na ino em yet wanpla tasol.
Long mun August 2019, wanpla protes ibin kamap long Surabaya, East Java long Indonesia taim wanpla rasist pasin ibin kamap we ibagarapim ol Papua sumatin. Indonesia gavman ibin sutim tok olsem Mr Yeimo em ibin mastermind long displa protes na sasim em long treason or em wokim kraim agensim state.
Jayapura Court of Judges ibin painim em gilti na salim em igo kalabus wanpla yia. Long Septemba displa yia em ibin lusim kalabus na go free.
Pastaim long displa kot blong em, em ibin go stap long Papua New Guinea long abrusim han blong Indonesia gavman.
Em itok maski em ifree nau long displa taim, igat moa wok yet long mekim long tokaut strong yet long hevi blong ol pipol blong West Papua, na em itok tenkyu long luksave blong ol intasesenal oganaisesen olsem Liberty Victoria long givim em displa awod.
West Papua lida na aktivist, husat istap long Australia, Ronny Kareni ibin stap tu long Melbourne taim oli long makim Mr Yeimo na kisim displa awod, na em itok em bikpla hona tru long Mr Yeimo na ol pipol blong West Papua.
Em itok displa awod em igivim luksave long hevi blong human rights issues long rijen na raun long wold tu.
Mr Kareni itok em igat bikpla bilip olsem em yet bai lukim ol pipol blong em ikamap fri pipol.