Biknem foma ragbi lig star, Marcus Bai itok Papua New Guinea igat planti wok long mekim pastaim long kantri iken putim wanpla tim igo isait long National Rugby League o NRL kompetisen long Australia.
Mr Bai itok PNG praim minista James Marape ibin askim em long tingting blong em long displa tasol em itok planti wok istap yet long mekim redi wanpla strong tim.
Em itok stat blongen em long wok wantaim ol skuls na junia kompetisen long PNG na sait blong management blong tim long kain bikpla level blong gem.
Mr Bai itok ol NRL klab long Australia isave strong long wanem, ol isave igat ol gutpla program blong ol pikinini long play long statim intres blong ol long gem.
Em itok PNG igat gutpla sans long joinim NRL tasol igat planti moa wok yet long mekim.